爱华网鋼琴令籍籍無名的陳雋騫（Phoebus），搖身一變成「鋼琴王子」。每逢星期六、日的海港城，不論老中青fans，都會帶備靚湯、蛋糕給他。
這位迷倒萬千女子的王子，更包括他的現任女友：黃霑的女兒黃宇詩。在音樂世家出生，他的父親陳鈞潤是歌劇迷，曾將莎翁的《第十二夜》和法國作品《大鼻子情聖》，翻譯成粵劇《元宵》和《美人如玉劍如虹》，90年更得到藝術家年獎。
背負父親的名字，Phoebus童年在家中，只是一個毫不起眼的成員。「我細個好鬼鈍，三、四歲先識講，第一句唔係講爸爸媽媽，而係嗌救命，爸爸媽媽都以為我係低能，彈琴又無家姐同細佬咁叻，比起屋企人，我就好似一隻井底之蛙。」
諷刺的是，今天姐弟都放棄了音樂，反而只有他以音樂作伴，還在上年開了studio，將會幫原子鏸、陳宇琛出碟。
Profile
陳雋騫（Phoebus），廿六歲，五年來在商場演奏鋼琴，彈的不是古典音樂蕭邦、莫扎特，而是由觀眾即點即彈流行曲，如古巨基的〈天才與白痴〉等，彈三首歌就收5,000元，除了鋼琴表演外，還開了PAHouse Studio，出租音響設備外，還租用給一眾明星用作錄音、演唱會排練室。現正準備替陳宇琛及原子鏸出碟，除了為他們作曲外，Phoebus亦在其studio進行混音、後期製作。
父母當白痴
星期日還未到七時，已有十多個追捧Phoebus的聽眾在等候，他一出現，便立刻遞上蛋糕、糖水，Phoebus一一道謝，才坐上琴椅上開始彈琴。
彈了首Ping Pung的〈愛是最大權利〉後，他才說：「我今日好呀，已經走了四場，現在是最後一場……」聽他講了一堆「無謂」的霞姐已追捧他五年：「我初初聽時，佢淨係坐度死彈爛彈，有女仔同佢傾偈，佢面都紅埋！而家多講，不過佢彈琴真係好掂，我點流行曲，好似〈大哥〉、〈K歌之王〉、〈天才與白痴〉，佢唔使睇譜就彈到！」
雖然被稱為「王子」，但Phoebus的衣履十年如一日：黑色西裝褸、牛仔褲加黑鞋，每次見到fans，他也是九十度角鞠躬打招呼，每天的表演都是挑戰：「點樣先可以令商場行人停落，睇你彈琴成粒鐘係一件難事，個種滿足感真係好大！」
「自信」兩個字在Phoebus臉上出現，但童年的他，「自卑」卻死纏不放。
他近四歲才懂得說話，第一句說的不是爸媽，而是「救命」！一次在家中，他正坐的韆鞦架爛了，一向不懂得說話的他，逼不得已才大嗌：「救命！」![[陈隽骞-Lydia] 陈隽骞 海阔天空](http://img.aihuau.com/images/01111101/01083334t01462095a013b07211.jpg)
父母更說他「低低」，小時擔心他是白痴。「兩歲那年，我做過兩次全身麻醉手術，一次係跌親整傷個嘴，另一次就係盲腸炎，我痛都唔識出聲，去到醫院發覺我條腸已經穿，屋企人就懷疑我智力有問題。
「唔好做鋼琴佬！」
Phoebus五歲開始學琴，但無論是學琴還是讀書成績，都被姊姊比下去，「我姐姐是拿full scholarship去英國讀音樂，每次彈琴比賽一定第一。Daddy都唔指望我拎獎，佢話：『呢個仔就當俾佢玩咪算！』就算係細佬，都係一年級就鋼琴比賽拎獎，唔似得我四年級先拎到第一個冠軍。陣我真係覺得自己似一隻井底之蛙。」諷刺的是三姊弟中，姊姊當了會計，弟弟就讀工程，反而只有Phoebus在音樂方面發展。
整傷手諗轉行
中五畢業後往加拿大升學的他，日日練琴外，還破了五十米的蛙泳紀錄，被選入國家游泳隊，美國密西根大學亦收他讀體育，但Phoebus為了將來生計都一一拒絕，希望唔使靠屋企人都搵到食。
「運動員生涯最多去到三十歲，我唔想成為屋企包袱，於是走去讀bio-chemistry。一次實驗，我對住個顯微鏡數緊向日葵花粉，我只係咳一聲就吹散晒，又要從頭數過，我覺得自己緊時間，應該揀番自己最鍾意音樂。」Phoebus才以交換生身份，回中大讀音樂。
無論在商場彈琴，或是在港台第四台擔任DJ的工作，在別人眼中，他只是因為爸爸的關係才得到工作，但原來機會是自己爭取回來。「返港後，我行經時代廣場，見到擺部鋼琴，於是寫信自薦表演。初時，媽咪話我商場彈好cheap，最記得聽到一個女人同小朋友講：『你睇呢個哥哥彈琴幾叻！不過，你要讀好書，如果唔係第日就做鋼琴佬。』我唔衰得，我時決定要做到有人主動搵我做show。」
開Studio先實際
原本他只是彈古典樂，直到有個途人問他識唔識彈王菲〈我願意〉：「當時，我憑記憶、不需樂譜便彈了出來。那次，我醒覺到要推介古典樂給人聽，也先要彈觀眾喜愛的流行曲才能留住他們。」當時，彈了短短半年的他，已夠錢買一架萬事得626。「唔使攤大手板問屋企人錢，開始有番————尊嚴。」
在時代廣場彈了五年再到海港城，又要重新開始，他想到邀請一批歌手一齊表演，每次自己一腳踢做聯絡，他親自打到英皇，「英皇娛樂」經理人霍汶希也說聽過他在商場彈鋼琴，第一次合作的歌手是吳浩康，陸續有何韻詩、王菀之等。不少人都想找他唱歌做明星，但他堅決不做：「我自己又唔係靚仔，唱歌又唔係特別好聽，只有彈琴比人叻，點做明星？」但在那時開始，他接觸到一批明星，自己的圈子也擴闊了不少。
他自信地說：「我都有諗過淨係彈琴過一世！」但上年的一次意外，弄傷右手，令他整整一個月彈不到鋼琴，他才想到：「沒有鋼琴就不能生活，就將彈琴賺來的一百萬，開設PA House Studio搵錢。」
開Studio的初期，Phoebus也碰過不少釘子：「初時我去國際學校傾搞音響，點知人一見到我仔look，即時唔同我傾，後來我邀請了在讀書時認識的德國人來港做我的marketing，顧客一見到佢，就以為係老細，俾到信心佢，才開始傾得掂生意。」另一方面，商場彈鋼琴與明星建立的關係，也叫到不少明星租用他的studio，例如：王菀之、At 17、Kellyjackie等。
提黃宇詩即「閃」
原本一日彈四場show的他，加上studio的工作，現在他每天只睡三小時，拍拖，也沒時間。但他也知道女孩子最需要的也是時間：「女仔就最鍾意男朋友陪，但我永遠都唔夠時間陪佢！」記者問：「做你女友咪好慘？黃宇詩係咪你女友？」提到緋聞女友黃宇詩，原本說話自信的他，立時靦起來：「唔知呀……唔知呀……」
雖然辛苦，但Phoebus卻仍堅持彈商場show：「開studio好大壓力，反而依家彈show，可以暫時令我唔諗公司，個人先可以放鬆！」雖然由青蛙變王子，但鋼琴仍是他的避難所：「依家好似有成績，但我最希望係有一天別人見到我爸爸時，會說：『原來佢就係Phoebus個老豆！』而不是看見我時說：『佢老豆咪陳鈞潤囉！』」
現時，他雖然還未做到，但至少他可以自信地說：「爸爸很開心我能將音樂變成自己強項，仲讚我叻仔！不過就好心痛我因為做而瘦十幾磅，原來佢都好關心我！」說時這個刻板又瘦削的「王子」，泛起一絲童真的笑容。
